林昌記 (Closed)

呢間林昌記 位於 連接 尖東同紅磡嘅天橋中間, 位置就唔算方便啦, 之前想試好耐, 不過每次行到呢個位都已經係 食到飽一飽 今次 特登留肚 終於試到啦。喺天橋中間轉入去 呢度有兩間 舖頭 左手邊嗰間就係林昌記啦, 舖頭 細細 只供外賣, 買嘅嘢種類唔多 一眼望曬, 主要就係魚蛋魚蛋同埋唔同味嘅魚蛋  不過正所謂貴精不貴多嘛 , 選擇唔需要多最緊要好食。 (牆上poster貼住新品上市 有新出既海鮮炸角 & 海鮮燒賣), 不過眼見個個都叫魚蛋 羊群心理作祟 我都係叫返魚蛋好啦。佢哋嘅魚蛋同我哋平時食開嘅有啲唔同 每一粒都白雪雪滑捋捋 賣相相當唔錯, 我呢啲怕辣之人鍾意原汁原味就當然係叫原味啦, 唔怕辣嘅你就一定要試下佢哋自家製嘅辣醬啦, 仲有現成一樽樽可以買走。魚蛋嘅口感同平時食嘅好大分別 咬落 爽口彈牙 完全唔黐牙, 唔會有一種加咗麵粉嘅感覺, 味道剛好,唔會過度調味。只係叫左細魚蛋(十蚊七粒) 都有個杯仔畀你裝住 , 唔使拎住串嘢喺條街度 拿手唔成勢, 最啱我哋呢啲顧及形象而同時有為食嘅靚女啦。