Video
Read full review
2013-07-11
63 views
盛夏！外面氣溫熱爆，走落地庫，嘆杯雪糕，爽晒啦！家樂坊商場個地庫轉型之後，旺咗好多，好幾間食肆都長期有條小人龍。不過，之前近門口嘅Tutti Frutti，齋賣乳酪，太過單一，生意唔易做，尤其乳酪瘋一過，好易無以為繼，都仲未幫襯過就俏俏消失咗。換嚟新開嘅Spade by Lassana，由於店子唔單止主打法式雪糕，更有自家烘焙嘅咖啡、酥餅、精緻嘅甜點，以及特色三文治，感覺更全面，嚟當正餐又得，下午茶小歇又得，飯後甜品都得，今晚就同朋友嚟個巨型雪糕、甜品小派對，讓盛夏變成美味盛會！店子設計非常簡約，白枱白櫈予人光潔明亮，門口大大個紅底白字招牌，甚為搶眼。全店主要都喺啲活動二人枱，可以互相拼合，我就最鍾意門口介紹Lassana Toast個易拉架，寫住「歡迎拍照」，你啲嘢掂嘅，唔會怕被人抄，好食嘅又自然被人放上網推介，好過嘥錢賣廣告啦！翻翻餐牌，原來都有幾多嘢食，為免淨食雪糕、甜品感覺太寡又太漏，先嚟兩客三文治共享，墊墊肚，打打底。餐牌中嘅「Lassana All Day Set」，就喺店中嘅包點套餐，一共有6款麵包供應，包括：巴馬火腿法式香草包（$39）、三文魚法式墨汁包（$39）、三文
店子設計非常簡約，白枱白櫈予人光潔明亮，門口大大個紅底白字招牌，甚為搶眼。全店主要都喺啲活動二人枱，可以互相拼合，我就最鍾意門口介紹Lassana Toast個易拉架，寫住「歡迎拍照」，你啲嘢掂嘅，唔會怕被人抄，好食嘅又自然被人放上網推介，好過嘥錢賣廣告啦！
翻翻餐牌，原來都有幾多嘢食，為免淨食雪糕、甜品感覺太寡又太漏，先嚟兩客三文治共享，墊墊肚，打打底。餐牌中嘅「Lassana All Day Set」，就喺店中嘅包點套餐，一共有6款麵包供應，包括：巴馬火腿法式香草包（$39）、三文魚法式墨汁包（$39）、三文魚碎蛋牛角包（$39）、火腿三芝士牛角包（$34）、牛油果雞肉沙律三文治（$36）及凱撒雞肉卷（$34）；另外，亦可加錢配是日餐湯、咖啡或茶（可選$30或以下熱飲，如多過$30嘅需要補回差價）、Lassana雪糕（細杯裝），收費為+$20選一款，+$35選兩款同埋+$45選三款，彈性頗大，食多食少，要湯定要咖啡，一切都好自主。
牛油果雞肉沙律三文治 $36整體賣相不俗，三文治伴有雜菜沙律同烚蛋，而沙律菜新鮮度十足，亦食得出加咗少少油醋撈過。份三文治唔喺就咁用上普通方包，包邊香脆帶點柔韌，而包心添加咗點黠香草，主材料嘅牛油果雞肉沙律非常足料，不過牛油果偏少，雞肉就好多，配上酸香嘅沙律醬，真喺幾正。而配菜仲加入埋青瓜、蕃茄、洋蔥，製作用心嘅一份三文治。
三文魚法式墨汁包 $39加咗墨魚汁所做成嘅法包，除外觀好「墨汁」之外，味道又未至於啖啖墨魚味咁，不過入口鹹鹹哋，個包身又挺香脆。同樣加有青瓜、蕃茄……等配料，配合埋鹹鮮嘅煙三文，入口味道富層次。
南瓜湯（All Day Set補錢選項）店中好似無單售餐湯嘅選擇，所以無單價比大家參考，而是日餐湯有南瓜湯及野菌湯，小弟揀咗前者。南瓜湯色澤深橙，滔一羹仲見到絲絲南瓜蓉，南瓜味非常突出，味道帶甜，足見落足料，不過口感較粗，撞多少少忌廉相信效果會再好啲！
鮮奶咖啡Caffe Latte（All Day Set補錢選項，單售中杯$28，大杯$32）飲品有唔少類別，以咖啡最多選擇，晌近期一本飲食雜誌得知，原來店主之一喺大賽中冠軍級人馬，除經驗豐富之外，更有唔少專業資格，據講店中咖啡全部自家晌工場炒豆、烘焙，依個已經喺一個亮點啦！除咖啡以外，仲有花茶、朱古力，仲有幾款沙冰，大熱天時就啱晒啦。鮮奶咖啡喺小弟偏好，所以今晚都喺揀佢，既然老細對咖啡有要求，自不然都要求店員沖出最好嘅咖啡奉客，拉花細膩晌賣相先拔頭籌，飲落奶泡好豐厚，如絲柔滑，而以據店員講，佢哋啲咖啡豆嚟自巴西、尼加拉瓜、薩爾瓦多幾國，咖啡因會相對低，而入口有輕輕果香，唔點帶酸味，正！
阿法奇朵Affogato（All Day Set補錢選項，單售$40）朋友點咗一杯阿法奇朵，唔喺因為鍾意，純粹因為好奇，睇餐牌嘅描述：一球雪糕拼雙份意式濃縮咖啡，甚有賣點。由於佢分類於飲品中嘅「意式濃縮咖啡」一欄裡面，令我哋誤以為佢都喺一款飲品，具體嚟講，應該喺一款甜品至啱，原來喺澳洲當地一款有名嘅甜品，雪糕之上淋上熱辣辣咖啡。端上嚟嘅阿法奇朵，以透明玻璃杯盛載，一大球雲呢嗱雪糕望見已有啲透心涼嘅感覺，而意式濃縮咖啡香氣四溢，比起就咁食咖啡雪糕，咖啡味更鮮活跳脫！
宇治金時（All Day Set補錢選項，單售細杯$32，中杯$36，大杯$40）其實店內所售賣嘅杯裝雪糕有兩種形式，一種喺「Make Your Own」嘅車仔雪糕，由揀幾多球雪糕、要唔要窩夫杯、加幾多樣配料都由你話事；而另一種喺「Lassana Ice Cream」嘅設定配搭，由7款基本口味嘅雪糕，加兩至三樣配料而成嘅指定款式。宇治金時，將綠茶雪糕放晌冰板炒至軟滑，放上日日鮮製嘅窩夫杯內，再加埋日本丸子，淋上紅豆，就成為好和風嘅指定款式，不過，今晚無丸子供應，有點可惜，但店家搵咗「金寶」（Crumble）代替，效果又唔錯喎；另外亦可以好似我哋咁要求炒雪糕時加入紅豆同炒，咁食起嚟紅豆就更「勻巡」，紅豆入口清甜，金寶香脆唔太重牛油，而綠茶雪糕茶味濃郁，由於店方所賣嘅喺法式雪糕，即喺製作時入加鮮忌廉，所以口感更柔滑豐厚，再者，據介紹全部雪糕都喺晌工場自家生產，不單百分百本地製作，仲日日新鮮製造，貴一點都值啦！
雖然上面個宇治金時已經喺到咗甜品時間，但只喺熱身，未入正題！Lassana Toast先喺是晚焦點，再加埋見佢鋪尾個餅櫃有幾款精緻嘅法式甜點，忍唔住都要試番兩款先至滿足而回。野莓盛會 $88
一系列Lassana Toast共有8個款式，賣$78-$108，大大份嘅「多士」都可供2-4人享用。全部都以自家焗製嘅麵包做多士盒，加上不同味道嘅雪糕球，唔同嘅鮮果及配料組合，就成為各有特色嘅Lassana Toast。溫馨提示，因製作需時，要等上等15-20分鐘。
多士盒之上，以草莓及雜莓雪糕為主角，唧上鮮忌廉，加入草莓、藍莓、野紅莓幾款鮮果，再用上草莓味馬卡龍同草莓味百力滋為裝飾，最後就淋上草莓味糖漿，就變成不單賣相有睇頭，仲配襯得非常之靚嘅「野莓盛會」！依份大堆頭嘅忌廉、鮮果、雪糕已經令人食得津津有味，淺紅色嘅草莓雪糕富奶香，又夠晒滑，而深紫色嘅雜莓雪糕莓味濃郁；忌廉採用法國總統牌，挺身得嚟依然幼滑香甜，但驚喜豈止於此。多士盒用上丹麥方包，真喺不惜工本做到最好，食起嚟更酥香柔韌，帶有牛油香，就算撈埋忌廉同雪糕，絕對唔會有「發水麵包」嘅感覺；仲有「盒內」暗藏玄機，原來內藏住一粒粒嘅蜜糖多士粒，可謂極盡心思，多士粒滲出清香蜜糖味，個野莓盛會確實超正，值得推介！就算等十零分鐘，都絕對值得。
藍莓芝士撻 $28餅櫃所見共有4款法式甜點：雜莓撻、藍莓芝士撻、檸檬撻及紅桑子拿破崙蛋糕。店員話藍莓芝士撻喺店中人氣，所以先試依個。外觀做得極精巧細緻，尤其撻面嘅蛋白馬令，經火槍輕熨，做得外脆內軟；而撻身芝士味濃，帶少少酸，變得無咁「漏」，再者，藍莓好鮮甜，咁有水準都只賣$28，真喺頗為抵食，不愧店中人氣。
檸檬撻 $22相比起件藍莓芝士撻，檸檬撻就嚟得較平實，不過，質素不惶多讓。撻底做得好薄，內裡填滿厚厚「檸檬餡」，檸檬香味好突出，清幽酸香，非常醒胃，用上新鮮檸汁果然喺唔同啲！賣$22，又喺抵食之選。
大家對今晚個巨型雪糕、甜品小派對好滿意，都食得好滿足，若能夠人腳多啲，真喺仲想試埋佢個特色甜品套餐「驚喜甜品三重奏」呢！無論雪糕、凍餅、三文治，抑或飲品，處處睇出小店嘅誠意。
Post
