The Hideout Coffee House (Closed)

上年已經睇到食評介紹，見到大大舊烤蘑菇同牛角包已經覺得好吸引，好想去試吓。可惜地點唔太方便，一直未有成行。今次經過附近，又有少少時間，就特登去試吓！可能係平日朝早，只有一個客人，我就係第二位。cafe實在地方有限，好彩人少少，大家各據一方，可以靜靜飲杯咖啡，享受美味嘅牛角包。我order左個英式滋味牛角包餐，再加杯熱cappuccino. 由於即整既關係，都等左一陣先有野食。當食物送上既時候，聞到陣陣香味，真係即刻流晒口水，不過都係要相機食先。個set有2個蜂蜜芥末及牛油忌廉醬牛角包、烤蘑菇、煙肉和沙律菜。兩個牛角包既味道都好得，尤其係蜂蜜芥末味，真係好好好好味！牛角包好香好脆，兩個都好快食晒！而烤蘑菇亦都烤得好juice. 至於杯咖啡，睇得之餘都幾好飲，啱晒我口味！可惜當日時間有限，食完就匆匆離去，未有再坐一會。下次有機會，一定要黎慢慢嘆。