澤記快餐飯店 (Closed)

睇相見到呢度有巨型魚柳包覺得好吸引，所以嚟試下。餐廳距離柴灣地鐵站步行幾分鐘，睇地址寫係熟食中心以為係有冷氣，原來係露天大排檔格局。魚柳包係早餐同下午茶時段供應，當日三點幾嚟到，都等咗一陣先有位。兩個人叫咗一個巨型魚柳包，一個香煎豬扒撈麵，兩杯凍檸茶。巨型魚柳包 跟熱飲 $30 (凍飲加$3)雖然睇相已經有心理準備個魚柳包係好巨型，但一上枱嗰吓都嘩咗一聲即叫即炸嘅巨型魚柳係普通嘅雪藏龍利柳，吉列皮炸得好脆而且感覺唔油膩，魚柳食落肉滑無雪味，夾埋有酸瓜千島醬好好味。香煎豬扒出前一丁撈麵 跟熱飲 $38 (凍飲加$3)撈麵有好多款餸可以揀，本身叫沙嗲牛肉但係賣晒，就叫咗煎豬扒。豬扒係厚切，睇落似係半煎炸，食落好香口無咩鬆肉粉味。撈麵係落咗辣椒油撈而且好香蝦米味，落單時叫咗少辣，唔太食得辣嘅都應該食到。個魚柳包真係好巨型，所以我地兩個人最後食剩咗少少麵包。下次嚟要試下沙嗲牛撈丁，不過可能要等天氣無咁熱先喇。