快靚正燒味粉麵茶餐廳 (Closed)

突有來賓到訪，受屋企人之命，要斬料返屋企加餸。見到招牌快靚正，真係想睇有幾快靚正。街窗掛滿各類斬料，任君選擇，而家色澤唔錯。店內好多街坊客，可見人情味甚重。炸乳鴿有滷水乳鴿，可以原隻即炸。轉個頭師傅已經拿咗去炸，新鮮滾熱辣，香味飄逸。叫師傅幫手一開四，手起刀落，已經完成。返到屋企一試，肉質幼嫩，而且因為滷過，好入味。燒鵝外層香脆，內層鮮嫩，中間夾住薄薄嘅油脂，唔會太油，恰到好處。燒鵝識食一定要配酸梅醬，可以將味道升華，而且有助解膩。燒腩仔係骨腩而唔係腩肉。骨腩近骨，所以肉質較滑，而且層次分明。表皮好香脆，沾上芥辣，另一番享受。