傷心酸辣粉 (Closed)

公司有幾個嘗辣嘅同事成日都推介呢間傷心酸辣粉，佢地話雖然好辣但一食上引，今日終於來到一試。六點幾就到左，唔使等位。一入門就有好强烈嘅酸辣味，啲味真係搞到有啲流眼水。不嘗辣的我有點卻步……唔想諗嘅情況下點了二人套餐，全部要小辣，套餐$128都算係幾平。紅油青瓜，青瓜爽脆，要了小辣所以不算太辣可以入口。大量嘅蒜同辣油，好惹味。麻辣肚絲併紅油脆耳，豬耳份量比肚絲多，不知為何，兩者口感差不多。下例口水雞，有十多件，雖然有大量嘅辣油浸住，但呢樣係三碟之中最唔辣嘅。雞食得出係雪雞，完全無雞味，肉淡皮下脂肪又不少，好一般。酸辣粉，份量只有譚仔的一半，雖然係叫左小辣，但我呢碗野超辣。紅薯粉有咬口，加上芫荽咸菜同花生，又真係越食越好味喎。由於太辣，只能慢慢食，細細碗都食左好耐，仲食到流哂鼻水添。餐飲要了凍檸茶，要加三蚊，咁辣唔通仲叫熱飲咩。大眾貨式，欠茶味又超甜。