溢溢掂 香港味道 (Closed)

平時好少係中環食野，因為都偏貴，但今日係細街入面見到哩間車仔麵，岀面嘅翻工一族大排長龍，望一望價錢又真係幾平民，於是試試佢！好似平時嘅車仔麵咁，自己拎紙揀餸揀麵揀汁，寫好就排隊俾錢等拎外賣。佢個度有堂食，但主要係做外賣生意，堂食位置得好細，要企係度食。我個日由於唔洗翻工，所以堂食，感覺又幾有舊式車仔麵嘅feel。佢都好多餸可以揀，我叫咗四餸麵套餐，可以唔理價錢任揀四樣餸，都幾抵㗎！我揀咗叉燒，菜心，蝦餅同埋雞翼，要咗米粉。黎到好足料大大碗，仲另外俾多碗湯我，好正。佢哩度啲叉燒好正！咬落係爽口㗎！！！而且幾厚身，唔會起渣！我想買成條翻去食哈哈哈！蝦餅係一大塊，厚厚一舊，好有口感！仲有雞翼入曬味，好食！我試埋佢間鋪推薦嘅花膠碗仔翅，同樣好足料，每一啖都會食到花膠同翅，凍冰冰食翻碗真係好暖！大大碗都係十幾蚊！其實係中環哩啲高級地方有平民價嘅食物，真係唔多，唔怪得咁受翻工人士歡迎。