海雲台 (Closed)

對上一次入長洲已經係三年前，當時去做嘢，冇時間搵好嘢食，印象中長洲冇咩特別出色嘅食店。不過今日再入去，就發現多咗唔少選擇。今晚幫襯呢間叫海雲台，一聽個名，就知係食韓國嘢。我哋叫咗兩個定食套餐，分別係牛肉粉絲辣湯同韓式牛肋條，除咗主食外，每個 set 仲有三款前菜，白飯同飲品，份量好多。三款前菜係泡菜，醃蘿蔔同涼拌芽菜，前兩者醃得好入味好好食，芽菜冇咩調味，加上我本身唔鍾意食，所以感覺麻麻。牛肉粉絲辣湯配料除咗牛肉同粉絲外，仲有生雞蛋，魚板同超多黃芽白，熱辣辣，好豐富😙。由於叫咗減辣，辣度唔算高，啱哂唔太食得辣嘅我，食食下，直頭用湯嚟撈飯，好滋味😋。牛肋條一上枱，見到底下啲紅蘿蔔白蘿蔔炆得好腍，就知道呢碟嘢有啲料到，果然，牛肋條炆得好腍好入味，而且有四大條，堅抵食，兩款蘿蔔更加係又甜又腍，不過呢個餸一定要盡快食，因為一凍咗，個汁啲油會凝固，形成一塊塊白色嘅肥膏，好嚇人😨。套餐包熱飲，不過我哋行到身水身汗，於是加四蚊轉葡萄柚乳酸，呢杯嘅好處係唔太甜，不過與此同時，乳酸味亦唔算突出，係杯正常水準嘅飲品。兩個餐，如果唔轉特飲，埋單剛好一百蚊，真係超級抵，市區都幾難食到😂。