阿木台灣麵 (廣華街) (Closed)

最近無咩食到好味嘅台灣野，突然諗起一直好想試嘅阿木牛肉麵，雖然明知要等好耐，但都決定一試。大家記得先download app攞位，如果去到先攞飛，至少要等一個鐘。我就係去到先攞飛嗰個，所以等咗足足一個鐘先可以食，裏面嘅環境比較狹窄，二人枱比兩塊膠板夾住，兩個人好似喺個窿度食飯。蕃茄湯底嘅面頭略嫌都有，不過蕃茄味都幾香濃，冇轉關廟麵，食返預設嘅手工幼麵，點知仲有驚喜，麵條雖幼，但竟然有咬口，而且非常掛湯!! 牛展非常淋，而且極厚極大塊，單靠一對即棄木筷子，要夾起咁有份量嘅牛展有啲難度!牛筋淋到幾乎化於湯底，整體成碗牛肉麵非常高質，一定會再食。至於蛋餅就有啲失望，外皮好軟身，冇乜香味，裏面亦冇乜芝士，所有味道被肉鬆搶哂，食唔到其他食材嘅味道，蛋餅嘅質地亦唔係我喜愛嘅，一咬即散。