90s Lazy (先施大廈) (Closed)

好多時肯表態嘅都係小店，但係支持黃店還支持黃店，好唔好食先係重點。而今次食到呢間係唔好食既。環境來講係幾靚嘅，鍾意打卡嘅人一定會中宜。坐得唔算好迫，加分。但坐得靚有咩用，嘢食真係唔得。【oreo milkshake】奶昔呢樣嘢都好難錯，但係呢杯係我人生飲過最難飲嘅奶昔。唔知老細係省時間幾杯一齊打？定係發緊夢？入邊嘅材料比例錯晒，我收到呢杯嘢飲唔夠5分鐘，佢已經變成一杯奶水。正常唔會係咁囉。係落得太少雪糕，定係冇雪糕？定係個雪糕唔夠凍？一嚟就收到杯咁嘅嘢真係好失望。係完全不能夠接受。如果偶爾一杯半杯係咁樣嘅質素，我應該去買六合彩。【鮮蝦珍珠帶子risotto】味道非常單調，唔夠調味，未到冇層次，佢食落似係用水煮咁淡。飯粒口感麻麻。剩係得一隻蝦，同埋少量嘅珍珠帶子，令到成碟飯非常單調。【野菌risotto】看圖都可以睇得出，又係一碗非常單調嘅飯。問題同上面嗰啲一樣，我兩碟都有食到，其實冇乜分別，小小冇誠意。總結，可能我真係咁好彩，成日遇到啲唔好食嘅黃店，最驚喜嘅係，咁餐最難食嘅，竟然係最難出錯嘅oreo milkshake。其實價錢唔算貴，但係呢餐，真係唔得。