Video
Read full review
2022-07-15
196 views
同朋友慶祝生日，佢話想嚟呢間新開的餐廳，好呀好呀，壽星女話事，咁就唔使煩惱去邊度食啦！我哋訂咗星期五頭輪晚餐，用膳時間係1830-2000。到餐廳時食客唔係好多，不過比較好的座位（窗口位、卡位等）就唔到我哋揀。睇餐牌果陣，見到菜式的價錢唔平，海南雞飯要$188，加一就>$200架喇。我哋4個女仔，點咗西瓜木瓜柚子沙律（菜名唔係好記得）、海南雞飯、Pad Thai、茄子、椰菜花、串燒雞翼x2串、辣汁芝士年糕x1串同埋炸蝦餅。第一道上的菜係西瓜木瓜柚子沙律，睇到真係差啲嚇到眼都跌埋出嚟唔係卦，咁細碟？係呀係呀，真係好細。。。啲木瓜同西瓜係波子的size 。。。當下有少少嚇窒咗，覺得貴到唔合理（主因係我太少食貴嘢）。不過，食咗一啖，我覺得係值得一試，因為佢係好清新、特別同惹味。我喺泰國住過一段時間，平常食到的木瓜津都係大同小異，而今次呢個係變奏版，亦係一個好味的變奏版。生果鮮甜，雪得夠凍，沙律的辣味、鮮味足。海南雞係一個人的碟頭飯份量，抵食一定冇份。我冇食雞、冇飲湯，不過有試的朋友都讚好食。茄子唔係常見的紫色或白色果種，佢係青色，幾特別，質感有少少稔，但又唔係一pat嘢咁，都ok。椰
我哋訂咗星期五頭輪晚餐，用膳時間係1830-2000。到餐廳時食客唔係好多，不過比較好的座位（窗口位、卡位等）就唔到我哋揀。
睇餐牌果陣，見到菜式的價錢唔平，海南雞飯要$188，加一就>$200架喇。我哋4個女仔，點咗西瓜木瓜柚子沙律（菜名唔係好記得）、海南雞飯、Pad Thai、茄子、椰菜花、串燒雞翼x2串、辣汁芝士年糕x1串同埋炸蝦餅。
第一道上的菜係西瓜木瓜柚子沙律，睇到真係差啲嚇到眼都跌埋出嚟唔係卦，咁細碟？係呀係呀，真係好細。。。啲木瓜同西瓜係波子的size 。。。當下有少少嚇窒咗，覺得貴到唔合理（主因係我太少食貴嘢）。不過，食咗一啖，我覺得係值得一試，因為佢係好清新、特別同惹味。我喺泰國住過一段時間，平常食到的木瓜津都係大同小異，而今次呢個係變奏版，亦係一個好味的變奏版。生果鮮甜，雪得夠凍，沙律的辣味、鮮味足。
海南雞係一個人的碟頭飯份量，抵食一定冇份。我冇食雞、冇飲湯，不過有試的朋友都讚好食。
茄子唔係常見的紫色或白色果種，佢係青色，幾特別，質感有少少稔，但又唔係一pat嘢咁，都ok。
椰菜花大家都讚好食，除咗椰菜花，入面仲有啲肉碎同大粒的豆，碟頭算係比較正常。
Pad Thai份量ok，勉強夠2個女仔食。佢炒得啱啱好，帶甜味，落咗青檸汁後就酸中帶甜，開胃，味道同喺泰國食到的好似，好味！
至於串燒，我哋點咗2串雞翼同1串辣汁芝士年糕。侍應幫我哋落單時已強調，年糕每串只有一細嚿（佢用手比划尺寸），其實串燒係我哋後加的，見過前面的菜式，我哋都預期到有幾細小。雞翼每串有2小隻，朋友食完話好食，而芝士年糕係我點的，$38/串，貴架，不過，試咗一小啖，覺得好正呀！年糕入口軟綿綿，又夠辣。
炸蝦餅係最後encore既，因為食完所有嘢，朋友依然覺得十分空虛，我諗，我哋連7成飽都冇。炸蝦餅有3件，以呢度提供的小食嚟講，佢算係好「大碟」，而朋友都話味道唔錯。
講番呢一餐，我哋幾個人，一路食，一路嫌費，但又一路讚好食。餐廳的食物係行精緻路線，唔係俾人飽腹，只係淺嚐，所以我覺得嚟食嘢前要先做好心理建設，調低你對食物份量的期望，咁呢，你係會食得好滿意、好開心既。我唔係食開貴嘢的人，但我會想翻頭食~~
服務方面，我覺得都可以。首先，我一坐低就順手放個袋喺椅背，但椅背中空，個袋差啲跌落地。於是，我姑且問侍應有冇籃可以俾我哋放袋，佢話冇（我覺得佢冇呃我，因為以我所見，成間餐廳都冇呢樣嘢提供）。不過，好快侍應就突然拎咗2個籐籃過嚟俾我哋擺袋。我覺得個侍應係有盡辦法幫我哋解決問題。不過，呢間餐廳晚市好繁忙，所以有幾次我哋想嗌侍應，而佢哋都留意唔到我哋。
Post
