Kazuki Bakery (Closed)

由於好多連鎖餅店都唔幫襯，發掘左好多良心小店，呢間小店早排免費派口罩畀有需要嘅人士，回饋社會，最重要係佢嘅茶味蛋糕好出色，係我心目中三甲，雖然價錢稍貴，但一分錢一分貨，食得出係用靚料。.丸久小山園抹茶x濃厚日本黑芝麻千層蛋糕:呢款王牌蛋糕近日重出江湖，標榜用日本產芝麻製作，芝麻味果然非常濃郁，每啖都好似食緊芝麻糊咁，蛋糕上嘅抹茶忌廉輕盈軟滑，抹味點到即止，但唔會被芝麻味掩蓋，中間則夾左特濃丸久小山園抹茶朱古力，呈流心狀態，比抹茶忌廉濃苦，回甘相當明顯，進一步將茶味帶出。睇相可見班戟有超過20層，忌廉塗抹得好平均，班戟皮比ladyM厚少少及偏軟熟，口感嘅野各有所好，但味道就一定呢款更勝一籌。Kazuki嘅厲害之處係唔會出現某種材料一面倒嘅情況，芝麻同抹茶相得益彰，相當難得。抹茶貝殼蛋糕:訂蛋糕可以用優惠價加購，常溫抹茶甜點好多都係有色無味，但呢款一入口抹茶味即時湧現，帶少少回甘，質地亦夠濕潤，烘熱左應該會更好食。