閨•家 (西九龍中心) (Closed)

喺深水埗西九龍中心呢個舖位，最近轉咗手開咗呢間閨·家，打正旗號話係無味精茶餐廳，聽個名都知道佢主打家的味道，今日又約埋個同事嚟試吓。雖然佢話自己係茶餐廳，但餐牌係一本用硬皮製成嘅多頁餐牌，圖文並茂，印刷精美，感覺比起茶餐廳嘅檔次高一點。講到冇味精，首先一定會諗起冇味精靚湯，呢度一星期七日會提供七款唔同嘅湯水，並且會隨飯餐附送細盅靚湯。嚟到當日係星期三，係海底椰栗子煲豬展，海底椰有潤肺功效，真係抗疫之選！第一次嚟食，就揀個人氣推介嘅香煎蓮藕餅豬扒飯，蓮藕餅爽口，豬扒屬於薄身豬扒，不過都幾大塊，我仲加咗$6有半隻溏心蛋，味道唔錯。同事鍾意食辣，所以叫咗麻辣口水雞配紫薯麵。口水雞辣度適中，紫薯麵顏色好靚，微微帶紫薯香味，湯底甜甜哋，麵嘅份量多，個人覺得幾抵食！另外叫咗香茅雞翼，香茅味唔重，反而配搭雪菜又幾新穎。自小去食上海菜已經鍾意炸饅頭，估唔到呢度都有得食，饅頭炸得乾身唔油膩，係令人懷念的味道！呢間閨家價錢親民，又有無味精靚湯，所以午市時間都要等吓位，希望呢份家的感覺可以延續落去啦！