餃里 (悅湖商場) (Under Renovation)

入到屯門諗住試下呢間餃子店～呢間只限外賣生餃+熟餃，不設堂食！位置比較偏遠少少，因為佢位於悅湖山莊入面嘅細商場，而且仲要轉輕鐵先入到去，基本上都係俾附近啲街坊入去買黎食。對於非居民黎講，係有少少唔方便，而我就買左生餃拎返屋企煮，幸好我開車入去有25分鐘免費parking!閒日6點鐘入到去都有4-5個人排緊隊，我就order左2打芹菜餃（$46）+1打紫菜餃（$52），個人比較中意放湯煮，另外再附上柚子汁+菜甫！先煮左2隻芹菜+2隻紫菜～（因為太好食，唔記得影相！）餡料包得非常飽滿！而且咬落去好爽口，個皮亦唔會覺得好厚，真係貨真價實！唔係求其塞少少餡料，再整到個皮好厚個啲餐廳，真係要俾like! 再配啲柚子汁一齊食，絕對可以提鮮！至於個紫菜餃，我就比較中意呢款，因為好難得地可以將紫菜當餡料咁包！而紫菜份量亦好多！反而我覺得唔洗點任個醬汁，就咁食更加好，因為咁先試到每樣材料嘅精髓！