富豪酒家 (Closed)

今日一個大客戶約我出去食午餐，話想多謝我之前嘅幫忙，幫佢解決左一D技術上嘅問題。我哋呢D做細嘅，當然留比D老闆話事啦。老闆即係老闆，一句就話"去銅鑼灣富豪啦"...今日1點嚟到，坐底等。呢度嘅裝修都好OLD SCHOOL，幾切合富豪呢個名。老闆嚟到點菜，即點咗佢哋一D必食菜式。阿翁鮑魚咁出名，又點可以冇呢。正宗日本吉品鮑魚，我估應該廿頭，真係做到糖心黏刀。一流！紅燒翅，湯頭濃郁，啖啖都有金華火腿同雞嘅香+鮮，翅亦都係一梳梳，非常飽滿。炆燒班骨腩，啖啖肉，乾身味濃，合格！最喜歡係佢D生蒜粒，極品！半隻鹽焗雞，用上新鮮雞，皮脆肉嫩，表皮下嘅薄薄黃油，真係非常甘香，令人回味無窮。富豪荷葉飯，用上鮑汁，蝦米，瑤柱，呢個組合邊有得輸。係好似鹹咗少少。椰汁燉燕窩，雖然只係用碎燕，但係品質都唔差，啖啖都滿口燕窩。呢度叫得富豪酒家，真正係品質優越，難怪咁多年都係富豪飯堂！希望有朝一日呢度都可以係我嘅飯堂！