緣屋 札幌元袓蝦湯拉麵 (信德中心)

Open Now

Now Closed

嚟到信德中心,見到有間寫住元祖蝦湯拉麵,半信半疑咁走入去試下囉。因為大多數寫魚湯米線、魚湯拉麵之類,湯底都係冇乜味,有樣冇味,所以今次膽粗粗咁走入去試一下。叫咗海老拉麵味噌味,同埋辣味噌。嘩…呷一啖,蝦味勁濃嘅湯底,真係名副其實! 拉麵就成卷曲形,有啲似公仔麵feel,叉燒就淨得一塊,孤寒咗啲,仲有半隻半熟蛋,蔥花就得幾粒…除咗個湯底,樣樣都係爭少少喎。如果你好似我咁,冇追加叉燒、葱花,唔係就會有啲失望囉,咁靚嘅湯底應該配上足料嘅配菜先至食得滿足㗎嘛。下次去食就識得追加喇,如果計埋追加,計落就要一百蚊一碗,其實佢落足料,賣一百蚊一碗,都係坊間好味拉麵嘅公價,條數咪喺番度囉!