梅貴緣 (Closed)

頭先同個friend諗住去深水埗食強記，點知full晒要等唔知幾耐，照等啦。等等下見到對面有間好似係餐廳既野窗上面貼住d咩58、78。八卦過去望下，有位阿哥就係咁一輪嘴講：素食自助餐78蚊任食，xxxxxxx(中間果d聽唔清楚) 咩都有....咩話78蚊？有冇咁著數？講真我唔係幾鍾意食齋，不過見佢咁平，入去行個圈睇下佢有咩食啦，反正強記唔知要等幾耐。頂，入到去睇咪又係冇位，間野都算細間，眼見應該冇30個位，俾人行既地方唔多夠闊，其實同入面d夾緊野食既客迫住行。真係咩都有，炒飯、炒麵、菜s、豆腐，瓜s、煎糕s、炸野s、菇s、糖水、湯、甜品s、生果等等，仲要有檸水同中國茶飲。我同個friend見咁筍即刻話試下，好彩咁岩有兩個客食完，唔駛等。食物味道唔差喎，似係一般酒樓食果d餸菜，佢地有埋番茄蛋，蛋都算齋？炒飯都有蛋，事但啦，我又唔係信佛。當中有隻叫唔知咩炸南瓜餅真係幾好食，外脆內軟，又唔算太甜，我啪左3舊。傾下食下坐左成個鐘有多，飽到一個點。埋單走人，原來加一都唔駛，真真正正$78任食。我本身都唔多食齋，不過食完今次應該會再叫d friend同屋企人黎再食。