鯛魚魚湯專門店 (Closed)

天氣開始熱，我同M佬近排都無乜胃口，所以今日就清清哋食個湯飯啦！特登去到呢間位於鰂魚涌太古坊附近嘅日式鯛魚魚湯專門店，主打鯛魚魚湯，聽講鯛魚魚湯係低脂、高蛋白質仲好養顏，所以姊妹們想食得健康同越食越靚，就要早啲嚟排隊先得呀，因為呢度真係好full㗎！皇帝蟹腳海膽湯飯：限量發售嘅招牌菜，真係早到先有得食呀！上枱個時仲有個小火爐等佢可以保持溫度。用鮮鯛魚熬製出嚟嘅湯呈奶白色，味道好鮮甜又香濃，仲有少少胡椒香味，湯底一啲都唔腥，而飯底仲完全吸收晒魚湯味，真係好好味。而蟹腳仲有４塊，蟹肉厚身又新鮮，食落口啖啖肉好滿足！至於海膽差唔多有半板，份量一啲都唔少，好fresh呀！鮑魚花膠魚肚魚湯飯：同樣地用上鮮鯛魚熬湯，配上2隻鮑魚、花膠、魚肚，真係好矜貴呀！而鮑魚好煙韌彈牙，好有口感呀！至於花膠同魚肚份量唔少，完美地索晒湯底，仲要好軟腍，好味又健康嘅選擇！餃子雞翼：除咗兩個湯飯，我哋都叫咗2個小食，其中一個係餃子雞翼，先將雞翼去骨，再釀入餃子餡料，雞翼漲卜卜之餘，兩邊仲燒到有啲焦香，好Juicy呀！吉列炸豬扒：炸到金黃色又香脆，大大塊之餘肉質又夠香！配上日式醬汁或沙律醬更加令味道提升呀！