大榮華圍村菜 (Closed)

今晚，又有朋友生日飯局。我地一行1O人去嘅係一位好出名嘅食家'肥滔'做生招牌嘅酒樓。可能因為平日嘅關係，所以酒樓唔算多人。不過多客人都與我地無關，因已一早訂房同寫菜餐。每間房最低消費是3500蚊。食物方便……半肥瘦叉燒 拼燒肉， 叉燒大大嚿，一嚿起兩嚿止， 第三嚿已經覺得肥膩得滯啦。燒腩好脆，夠香口。蒜香焗金蝦，蝦太細食，蒜香汁惹味。鮑魚鵝掌， 一人有一隻鮑魚， 生菜墊底，可惜鵝掌炆得太淋，欠口。蛇羹，大窩，每人至小1碗半，夠蛇肉 及待應会送上源源不絕的薄脆。蝦子柚皮，柚皮唔夠味，炆唔淋，稍為差咗少少。粟米斑塊， 夠多粟米汁， 斑塊新鮮脆口， 冇骨，老少咸宜。 炸子雞，冇特別、冇驚喜、同平時酒樓食嘅差唔多。 油鹽煮菜心，大碟到嚇親我地， 估唔到中間既粉絲入曬未， 有意外驚喜。跟住再有糯米飯，估計不是生炒的，味道一般啦。由於朋友太喜歡食甜品， 所以叫了三款不同的。壽包，不是蓮蓉餡是紫薯的，啱哂唔食蓮蓉既我。千層馬拉糕，好軟熟，熱辣辣，超得。白蓮蓉焗布甸，唔太甜，好多白蓮蓉。