Bella Shine (Closed)

之前去過呢間餐廳，佢而家轉咗少少型，變咗做半自助海鮮餐，一定要去試試啦。入到去小品裝修依舊，但係已經有晒自助餐嘅格局。自助吧區分別有沙律吧，海鮮專區，甜品專區同埋雪糕。當然要試試吓佢嘅沙律吧，沙律菜都有好幾款，配埋唔同嘅汁醬，林林總總。而海鮮呢，蝦就隻隻都非常之鮮甜彈牙，青口都唔係交行貨喎，亦都非常之鮮甜，最有驚喜嘅就係隻螺肉，螺肉一拉出嚟非常之鮮甜，跟住飲埋個雜菜湯就開始嚟主菜啦。主菜都係任食，但太飽嘅關係我哋都係嗌咗一份紐西蘭西冷牛同埋一份美國豬肩扒。西冷扒非常之香肉味，亦都燒到有少少炭香嘅味道，但仍然可以鎖住入邊嘅肉汁。另外有驚喜嘅竟然係底下嘅紫薯，甜甜地配埋濃濃嘅肉味，恰到好處。而豬肩扒呢，唔好見到佢好似好乾咁，師傅煎到佢外脆內滑，亦都可以保留到豬嘅肉香。另外嗌多個冬陰功雞柳意大利飯，呢個出奇地好味，每一啖都比滿滿嘅冬陰功汁包圍着，鍾意食酸酸辣辣嘅朋友一定好滿意呢個飯。最後重任食Movenpick平雪糕，真係食返夠先走。