祥仔辣辣 (海運大廈) (Closed)

近排海港城泊車優惠太吸引，所以揸車出開尖沙咀都會泊喺海港城，行下街食下野就可以免費泊車。今次係第二次食祥仔辣辣，見到大部分人都係食佢個辣辣二人餐 ($498, 正價可用海港城coupon，會員價就減$100)。可能太多人叫同一個餐既關係，除左甜品所以野食都好快上齊😅😅唔係好適合你慢慢歎，熱葷亦唔算好新鮮熱辣。前菜三小碟同土豆絲味道都係一貫食開既味道，個蝦 (冇影到) 就普通，而且唔係好新鮮，似係用左啲雪左一段時間既蝦。反而個辣子雞唔錯，餣得幾入味又好惹味，如果有碗白飯就正😋😋主角酸菜魚都交到功課，魚肉軟滑而且吸收左個湯底，幾好味，建議平時食到少少辣既朋友可以試中辣。甜品係椰汁做底既涼粉，賣相一般，個椰汁花奶睇落有少少癡埋一粒粒，有少少影響食慾。最大既敗筆係隻匙羹，個面太細但涼粉太滑，幾乎要扒入口先食到……總括黎講係不過不失既一餐啦。