名人私房菜 (Moved) New Location

工作繁忙，有時約朋友見面都要花上數星期先約得齊人～～一星期前，終於定到日子！朋友提議去食私房菜，貪佢靜靜地，又可以坐得耐少少～～咁就順便訂埋位。今晚私房菜嘅位置喺尖沙咀，旺中帶少少靜，喺北京道附近嘅商住大廈，唔難搵。可能提前訂定位，店員安排咗間房俾我哋，夠私穩又寬敞～坐低無耐，店員好快就上菜～首先，有<大白菜豬肺湯>，火喉十足，足料又清甜！<涼拌手撕雞>配料豐富，而且酸酸甜甜嘅醬汁配搭清新，夠曬開胃！<炸蟹鉗>好彈牙，餡料好實在，配埋自家醬，一流呀！<鮑汁花膠扣鵝掌>火喉夠所以好入味，膠質好重，全部又大大隻，好正呀！<糖醋松子魚>炸得夠乾身，入面滑外面脆卜卜，配埋個糖醋汁，餸返一流！<胡椒蝦>好夠胡椒味，入口有少少辣味，但係又唔會搶咗蝦嘅鮮味！配埋炸到脆卜卜嘅九層塔一齊食，味道好夾呀！<蝦乾肉碎通菜>用咗大大隻嘅蝦乾再加埋肉碎一齊炒，咸味好夠，又夠鑊氣，好食！<芒果布甸>芒果布甸當然唔少得配埋花奶一齊食啦，又香又滑，正呀！