Amour Garden Grill & Bar (Closed)

秋意漸起。放工忽想BBQ，於是約同三五知己一齊去都市中BBQ。上網搜尋之下，見到旺角鼓油街有場就毫不猶豫就去啦…雖然搵路比較困難，但係一上到去地方環境都唔錯，而且外面環境亦都幾舒服，微暗燈光配合輕快柔和音樂，令人係呢個都市中忙裡偷閒。呢到既BBQ係有分不同時段不同價錢，而且呢到BBQ係屬自助形式，食物同飲品都放係不同既冷凍櫃中，任由自己自取。食物方面款式亦都多:豬牛雞當然唔小得啦，仲有煙鴨胸，豬頸肉腸仔，不同款式既丸類，當然唔少得我最愛既粟米同蒜蓉金菇啦…呢到除左好似平時用既炭爐之外，仲有新式既石爐，火喉易於控制之外，令熱力更加平均。好適合我地呢啲四人燒烤。閑談之間，食物開始焦香金黃。呢到食物份量好足料，整塊牛扒完全可以蓋住爐面。每款肉類都好厚肉，而且醃製既肉類燒出來的味道唔錯。味道剛剛好並食出肉類既鮮味，尤其係雞翼，味道真係一流，甜甜焦香令人垂涎三尺。友人們仲不斷添食添!!!!!旁邊蕃薯粟米同金菇已經熟左啦…熱氣騰騰既香氣從錫紙中散發出黎。蕃薯同粟米味道香甜軟滑。金菇吸收哂蒜蓉既香氣，十分惹味。