老鍋台式火鍋 (京都廣場) (Closed)

好耐冇食過台式火鍋，咁啱今日得閒，即刻相約朋友出嚟銅鑼灣「老鍋」吃頓火鍋午餐。餐廳佔地 5,000呎，設有大量雙人和四人座位，門口掛咗好多色彩繽紛嘅「天燈」，營造出溫馨浪漫氣氛，好啱同朋友嚟影相打卡！點咗個午市二人火鍋套餐 ($299)，湯底四選一，有老鍋秘制麻辣鍋、老饕酸菜白肉鍋、尚膳養生鍋 同 我哋揀嘅「膠原蛋白美人鍋」。美人鍋材料好豐富，用上原隻烏雞、桃膠同粟米，再配以杞子、紅棗、黨參、淮山、北芪和龍眼肉等熬製，湯頭香甜濃郁，雞肉嫩滑，桃膠有助排毒、補充膠原蛋白，絕對係女仕養顏之寶。肉類三選一，有雪花肥牛、梅花豬肉同農場雞肉，肥牛肉色紅潤，雪花分佈平均，肉質軟嫩得嚟又不失嚼勁，帶濃郁肉香，輕涮幾吓就食得。丸餃拼盤有墨魚丸、香菇貢丸、台灣蛋餃同魚皮餃。墨丸真材實料、內有粒粒墨魚肉；貢丸彈牙帶嚼勁；蛋餃外皮軟嫩、肉餡鮮美多汁；魚皮餃水準亦唔錯，裡面嘅豬肉味好香好新鮮。五彩鮮蔬盤有生菜、娃娃菜、油麥菜、金菇同鮮冬菇，全部都係精心挑選，樣樣都好新鮮，入口又嫩又甜。最後仲有米線或飯可供選擇，食完夠曬飽肚。