Plato Cafe & Bistro (裕民坊YM²)

今日晚餐同朋友去左裕民坊嘅餐廳食飯。裝修左之後，多左唔少餐廳有室外座，我地就去左3樓空中花園嘅其中一間Plato Cafe & Bistro, 餐廳裝修簡約，有窗邊嘅高枱可以望到花園，都幾寫意。食物選擇都唔少，我地叫左一人一個dinner set,加多個小食 炸蕃薯條。卡邦尼煙肉意大利粉。經典菜式，賣相唔錯，卡邦尼汁濃稠度剛好，掛到意粉但唔會太挺身。味道香濃，配上煙肉嘅鹹香好夾。配堆雜菌多左一重口感，味道唔錯！另一個餐叫左 德國脆皮鹹豬手配酸菜。上枱勁大份，而且已經切好左排得好整齊，食起上黎好方便。鹹豬手調味聞落有鹹香，食落剛好唔會過鹹，而且豬皮真係好脆！！肉質有咬口但唔會乾。配上芥末醬同酸菜去膩，食落更清新。隨碟有沙律菜，食落新鮮。餐配是日餐湯，今日係甘荀湯，飲落有甘甜，口感順滑，食到粒粒甘荀，整體清新。小食 炸蕃薯條份量適中，熱辣辣，脆卜卜，帶微甜味，好食！飲品一杯叫左冰果茶，味道清新開胃，啱哂呢d悶熱天氣。另一杯叫左熱嘅焙茶鮮奶，淡淡嘅焙茶，飲落幼滑，味道舒服。食物質素唔錯，環境安靜，店員有禮。之後到涼涼地嘅天氣可以考慮下坐室外座，感覺會更悠閒寫意。