盛八食堂 (Closed)

之前都上網見到話呢間食蛋包飯都唔錯，好似都幾吸引咁。見到佢做團購現金券優惠，就決定去盛八食堂試下佢既蛋包飯啦！我叫咗黑松露地雞磨菇蛋包飯($98)，賣相幾好，黑松露都幾多。不過呢個都唔係正宗蛋包飯，睇完成個menu得兒童餐有西炒飯底+茄醬既蛋包飯，講真實在有啲失望，好想食正宗蛋包飯呀！但係呢個都唔差既，係雞唔夠滑，而且食落都幾濟下，而且好多味精，食完好口渴，一般啦。朋友叫左芝士野菌赤豚漢堡蛋包飯($98)，睇落都覺得好濃！同埋個蛋包飯一黎到就係咁既樣，個蛋包根本就爛左，好心就唔好拎出黎俾客啦！啲飯跌晒出黎核核突突咁，講真呢度食個蛋包飯又唔係平，真係應該再整過。赤豚漢堡好食係好食，但係真係好重味精，食完飲左2杯水都唔得，麻麻地。呢度最好食既竟然唔係蛋包飯而係小食。吉列盛合3點($53)，有洋蔥圈、雞粒同埋薯角。送黎既時候仲係熱辣辣，正！洋蔥圈同薯角都唔錯，係個雞粒有啲韌，都OK啦。今次黎完真係令我有啲失望，唔知係自己唔識叫定點，又或者可能香港真係冇正宗蛋包飯食得到，完全食唔返日本食到既味道。所以呢度即使用左團購優惠我都覺得麻麻地唔太抵食。