莆田 (Closed)

同屋企人周末食餐飯，就入左馬鞍山試下間莆田。先叫左個精美四小拼，入面有九轉小腸、蝦苗拌頭水紫菜、滷水嫩豆腐同埋水晶豬蹄凍。個小腸整到好多層，咬落厚實彈牙，亦都夠味。紫菜就用醋醃過，酸爽得黎幾開胃。豆腐夠腍夠入味，鹵水香不俗。豬蹄凍就不過不失。而個莆田扁肉湯，就似濃厚嘅清湯伴住迷你燕餃咁，暖身又鮮美。一品醉蚶食落都唔覺腥，不過正因為可能蒜味太強，稍稍蓋過醉蚶鮮味。莆田滷麵就足料大鍋，味道亦有層次，濃白滷汁同配料都互相襯托。大白菜燉軟豆腐就係清甜之選，燉得軟腍窩心。