BriKetenia (Closed)

有陣時真係會忽然好想食西餐！但西餐一係就好食但貴到食半個月人工，一係就平但似茶餐廳。不過之前去觀塘搵朋友食飯先發現有呢間西餐廳價格相宜，菜式多，質素一流，值得推薦。其實我去嗰時近情人節，餐廳都full booking架喇，幸好我地好早去，對方又好helpful幫忙調動一下啲坐位。就如好多西餐廳一樣，briketenia環境較暗同安靜，營造多啲私人空間比食客靜靜地傾計。Set dinner先黎既係法式洋蔥湯，一上菜時洋蔥湯既香氣撲鼻，令人急不及待要試一啖！洋蔥味道香甜，洋蔥煮得柔軟嫩滑，配上面頭濃郁既芝士味道，忍唔住一口接一口到飲到清光啊～主菜我地分別叫咗乳豬同羊架，乳豬每一口充滿油脂香，利用配菜上既蘆筍同紫薯蓉清爽中和咗整碟菜式不致太肥膩。羊架五成熟煎得啱啱好口感唔會鞋，咬落去啲肉汁滲哂出黎，即使唔係食肉獸都會欲罷不能！甜品以芒果為主題，賣相討好，特別推介芒果雪葩，酸酸甜甜，最適合配合法式小蛋糕同曲奇一齊食嘞。