閩南面線糊

Open Now

Now Closed

朋友住嘅屋苑附近新開咗間閩南菜館 - 閩南面線糊，叫我一齊去試吓。我哋叫咗以下菜式。蠔仔煎：佢同我哋平時食開嘅炸蠔餅唔一樣。平時我哋一般食開嘅炸蠔餅都係脆口嘅。但佢呢個閩南菜嘅蠔仔煎，係加咗地瓜粉落去粉漿入邊，咬落去煙煙韌韌嘅，好有驚喜。蠔仔新鮮肥美，而且清洗得好乾淨。糖醋排骨：呢款閩南式嘅糖醋排骨同我哋一般食嘅上海糖醋排骨都好唔同。平時食開上海式嘅會有比較杰身嘅黑醋喺表面，而呢個閩南式既係用上比較稀身淺色嘅糖醋。個人覺得閩南式嘅糖醋排骨更加食得出排骨既肉香味。牛頭獅：其實就係牛雜火鍋。入邊有好多種唔同嘅材料，包括牛筋，牛丸，牛肚，牛舌，牛腸，豆腐，白蘿蔔等等。各款牛雜都清洗得好乾淨，冇怪味。牛筋爽口，牛丸彈牙，白蘿蔔入味冇渣。個湯底都好清甜。我哋另外仲加咗個生菜同娃娃菜，啲菜都好新鮮清甜。配埋可樂就Perfect喇。