The Backstreet Kitchen (Closed)

又入到黎元朗食晏，朋友帶咗我去一條小路，以為食西餐嘅，原來黎到話係食吉列牛，平時好多人等添，星期六12點去到唔洗位good good。 石板吉列牛好耐之前已經想試，但香港仲未食過，始終好少地方有得食。店入面仲有介紹要點樣食，例如石板會有件牛脂肪可以掃掃石板等佢有油香啲之類。點完餐都要等一陣，因為睇住店員係廚房燒熱咗個石板先會攞出黎。 等咗陣終於見到炸牛排真身啦，牛小排大約會切成12小片，大約係2-3成熟嘅，等你自己再用石板煎，而且仲有椰菜做配菜，好豐富嘅賣相，而石板上都已經預熱同有牛脂，下面係用酒精爐，慢慢燒又唔怕大火，同埋有調味醬，飯係選項黎，加白飯或者加橫町飯或者加定食set 都得，我今次就唔想食白飯咁齋試下咩叫橫町飯。 吉列牛係用上牛小排，牛小排一般肉質都會幾淋，都算多油，但無乜牛味，一般熟食會比半生熟咁食好味，而店員推介食前加少少鹽煎會香啲，咁要先試味道就乜調味料都唔加，食落果然係無乜味，但炸粉唔厚，而且香脆。再黎一件落少少鹽石板煎，味道完全唔同，煎完兩面之後油香出咁啲，加埋醬汁食就更豐富。跟住就索性點完醬汁之後先慢慢煎，肉味即刻香好多，食嘅時間再加上薑，配搭起黎味道就好豐富。