Video
Read full review
2024-09-26
14968 views
Bookmark咗接近1年，全因小貪心，想趁生日去食，可以獲贈蛋糕吖嘛~訂位要喺2個月前進行，雖然到訪時係平日下午，但食客唔少，幾乎滿座，所以儘早訂位係必須。另外，訂位入座時間係每15分鐘一輪，我同狗狗爸爸早到，幸好上一輪有食客已離開，餐廳先可以安排我哋喺5分鐘內入座，否則就要直接等到訂座時間。我哋點咗3道菜午餐，一肉一素。侍應話2個人要食相同數量菜式，應該係要達到上菜時的一致性。首先上檯係酸種麵包，小小原個麵包，一開四，配以椰子油製的軟身素牛油。麵包可追加。第一次送上的麵包雖然好食但唔暖，所以外層過硬。牛油的鹹味突出，食耐咗或食得多，會感覺略鹹，而優點係佢非常軟身，一搽即刻會化成半液態的油，流入酸種麵包的孔洞，令成塊包充滿油脂，好可口！我哋喺用餐期間追加咗一次，第二次送上的麵包烘得夠暖，外層冇咁硬，趁熱食就更加食到麵包外脆內軟的口感。追加麵包時，第一次用過的牛油有剩，但侍應表示要收走，再俾過一件新牛油，顯示出餐廳對食物的完整性或presentation好有要求，但咁好味的素牛油（略鹹係後期先有感既），哪怕係食剩，就咁丟咗有啲浪費。上三道菜之前會有4道開胃菜，包括紫穌葉雪芭、kambu
訂位要喺2個月前進行，雖然到訪時係平日下午，但食客唔少，幾乎滿座，所以儘早訂位係必須。另外，訂位入座時間係每15分鐘一輪，我同狗狗爸爸早到，幸好上一輪有食客已離開，餐廳先可以安排我哋喺5分鐘內入座，否則就要直接等到訂座時間。
我哋點咗3道菜午餐，一肉一素。侍應話2個人要食相同數量菜式，應該係要達到上菜時的一致性。
首先上檯係酸種麵包，小小原個麵包，一開四，配以椰子油製的軟身素牛油。麵包可追加。第一次送上的麵包雖然好食但唔暖，所以外層過硬。牛油的鹹味突出，食耐咗或食得多，會感覺略鹹，而優點係佢非常軟身，一搽即刻會化成半液態的油，流入酸種麵包的孔洞，令成塊包充滿油脂，好可口！我哋喺用餐期間追加咗一次，第二次送上的麵包烘得夠暖，外層冇咁硬，趁熱食就更加食到麵包外脆內軟的口感。追加麵包時，第一次用過的牛油有剩，但侍應表示要收走，再俾過一件新牛油，顯示出餐廳對食物的完整性或presentation好有要求，但咁好味的素牛油（略鹹係後期先有感既），哪怕係食剩，就咁丟咗有啲浪費。
上三道菜之前會有4道開胃菜，包括紫穌葉雪芭、kambucha 湯、大豆布甸（？）以及紅菜頭棒棒糖。侍應一次過上4樣食物，不過「撻Q」，其中一枝棒棒糖喺不為意下「訓」低咗，要拎番入廚房。
紫穌葉雪芭：手指公的指甲大小，紫穌葉味濃，但太細粒，食感只停留好短時間，印象唔深刻
Kambucha湯：一湯匙份量，帶檸檬味，酸咪咪（都幾酸），幾開胃
大豆布甸：非常好食！分3層，上面係碎蕃茄、紅甜椒，味道特別又有層次，中間好似係以由豆奶製成的布甸，豆味濃，下層唔記得係乜，呈淡黃色，估計係蔬菜湯啫喱
紅菜頭棒棒糖：有少少食不出所以然，味淡，似一件由紅菜頭同其他淡味食材搓成的小波波，波波上的2件瓣，其中一件係薑味餅乾
（前菜）蕃茄雜莓大豆慕絲：慕絲同開胃菜果個類似；醬汁帶蕃茄酸，配搭以黃豆製成的慕絲/布甸，唔太適合，因為一酸（頗酸）一淡，對比過大，酸味遮蓋曬豆製品的獨特味道（豆味我係鐘意既），所以我冇撈埋食，亦唔喜歡個醬汁
（主菜）雜菌雅枝竹：主角係雅枝竹，醬太濃及過䶢；雅枝竹係我幾鐘意的食材，但餐廳的煮法唔係特別出色，一般水平；雜菌冇特別；由於個醬我唔識睇欣賞，所以喺食主菜的食材時冇點嚟食，到最後唔想浪費，用麵包醮啲醬嚟清碟
65%可可慕絲：慕絲下面有類似青檸味的醬，狗狗爸爸唔太喜歡，覺得既然係甜品，整到咁酸，食味麻麻；我覺得都ok，或者個醬係用嚟消滯，但側邊果兩小角牛油果就唔知為乜；慕絲上的幾片薄片帶咖啡味，而呢個甜品原本配咖啡雪糕，但狗狗爸爸唔飲咖啡，所以我哋改咗大豆雪芭，而味道上就唔係好食得出黃豆味；可可慕絲的甜度合適，但佢唔係好夠可可味，冇黑朱古力的甘苦，所以整體一般；味道雖然係複雜，但所有食材唔係好夾或好食
花生醬班㦸椰子雪芭（？）：唔肯定有咩食材，但記得有椰粒/椰子碎；花生醬濃，有花生碎粒，幾好食；班㦸/crepe墊底，淋曬，好難切細件嚟食，而且冇乜味；甜品的甜度合宜，食材配搭比65%可可慕絲夾；全個甜品喺表面上睇係純白色，好靚
Latte：咖啡nutty但冇乜特別
凍朱古力：狗狗爸爸話朱古力味同牛奶味平衡，但因為咁，可可味唔太突出，有少少過甜
果盤：侍應介紹各種生果的來源地，我哋食完甜品已冇胃納，需要外帶生果同其餘甜品、蛋糕；生果的質素好好，提子有葡萄酒香；蜜瓜質感軟硬適中，仲好甜；火龍果比平日買到的好食
瑪德連：狗狗爸爸話味道單調
朱古力撻：有朱古力味，唔過甜，但就冇乜記憶點
紅莓烏龍茶：細細杯，酸甜作結，有少少解膩用途；不過，我見侍應調配時，落咗好大pat紅莓醬，所以應該都幾甜
柚子朱古力蛋糕：生日贈禮；非常好食！蛋糕輕盈，食落唔漏；佢層次分明但幾夾，鋪面的柚子醬帶酸而開胃，然後係清淡的慕絲蛋糕體，裡面夾咗朱古力脆脆，最入面係榛子/朱古力醬，最少有4個層次的味道同質感，食蛋糕時，感覺豐富，滿足又唔會食到好飽
整體嚟講，素食者的選項基本上係零，只係需要表示係vegan定vegetarian，同埋侍應會特別問食唔食西芹，此外就唔需要揀任何菜式；肉食者可3揀1，其中一道主菜係和牛，加$750。以素食者肉度出發，黃豆的味道以及佢的慕絲/布甸口感可以話係貫穿全餐，挑剔啲會覺得食物變化唔大。雖然寫到佢的食物有少少單調，但事實上係幾啱胃口、輕盈同幾好食。環境方面，餐廳有少少暗，昏昏黃黃，下午時段拉上紗簾；座位坐得幾舒服，但檯與檯之間的距離同整體空間感一般（以呢個價錢嚟講），當full house時，行出行入要就住；餐廳冷氣大，一開始唔覺，但坐咗一陣就覺得幾凍，食幾個鐘會有少少頂唔順。服務方面，人手雖多，但未做到有侍應可長期mark一張檯，所以加水唔會即時發生；因為冇中文餐牌，坐低後我哋提出想由廣東話侍應講解，而餐廳只係儘量安排，就算個侍應係香港人，講廣東話，但有啲食材佢哋照樣係用英語講出嚟，其實我同狗狗爸爸都唔係百分百聽得明，而且亦唔係每道菜都由果1-2位侍應作廣東話講解，如後續的甜品，照樣係由外藉侍應英語演繹，不過雖然有少少語言不通，但侍應們都好有禮貌既。食物方面，我覺得偏鹹，呢個大部分係同個人飲食習慣有關，而坐我哋隔離檯的食客喺食海膽魚子醬時亦同侍應反映鹹得滯（檯與檯之間的距離就係我可以隱約聽到佢哋同侍應溝通的內容）。嚟呢度食嘢算係一次體驗，食完冇太舒服的感覺，始終醬料較濃同鹹，加上甜食多，都幾heavy，消化上有負擔。最後，講埋我的小貪心，就係生日可以獲贈蛋糕，不過我哋發現，幾乎檯檯客都係嚟慶祝生日架，所以餐費都差唔多係包埋個生日蛋糕架喇~~
Post
