牛記茶室 (Moved) New Location

下晝四點鐘，已完成手頭的工作，但晚上有function，所以都要等時間，唔走得。鬼佬宴會，一向無啖好食，諗諗下，都係食少少野打下底先。記得都一段時間無來這裡，加上地點偏僻隱蔽，實唔會俾蛇王的同事撞到，就約埋在附近工作的舊拍檔來飲杯野。牛記門面一般，但一向幾受歡迎，好似今日四點幾，都聚集了一班的士大佬在吹水，見老闆娘又個個都叫得出名，唔怪得咁旺場。叫了碗筋腩豬手河，加碟油菜，同兩杯熱奶茶。這裡的筋腩是柱侯煮法，因為牛筋炆得又腍又軟滑，所以關照老闆娘要多筋少腩，牛筋炆得入味，有水準。其實咁大舊牛腩，當然有韌有唔韌的地方，識叫自然會食得好一點。豬手其實是豬腳，皮多肉少，好在是用炆的，皮還算豐腴，不錯。菜綠油油的，一大碟，十蚊都算抵。同舊拍檔傾到成六點，埋單四十多，吃得飽一飽，個人覺得好抵。