Video
Read full review
2013-03-29
252 views
11月30日, 夜晚慶祝嘅主要一個環節當然係生日大餐, 當然我都一早決定咗去邊到食, 而奄奄尖尖嘅呀菲又會有意見, 最後就去咗一間佢話事嘅餐廳啦~ 喺一間商廈入面, 門面唔算大, 座位數都唔多, 好在我地冇book枱都有位, 侍應都有介紹我地食乜好, 服務都幾好.::: Onion Bread :::呀菲話佢地嘅麵包係自家製, 所以我地都諗住叫d嚟試~ 個menu都有幾多款架喎, 咁多個之中我地叫咗2個, 其中一個係洋蔥包.個麵包都幾大個, 大過平時麵包舖買嗰d~ 洋蔥包味道香甜, 有淡淡嘅洋蔥味, 咬落個包好鬆軟, 你話佢係即叫即做都唔算誇張, 當然唔係啦, 不過個新鮮感唔會喺其他廳餐食嘅麵包感受到~除咗麵包本身有味, 隨麵包碟仲附上4種調味, 包括黑醋、橄欖油、蕃茄醬同原個蒜頭~ 除咗普通嘅黑醋橄欖油, 蕃茄醬都幾好味, 蕃茄味唔係好酸, 但係都好清新~ 另外都要一提個蒜頭, 好淋又好夠香, 蒜味豐富, 令本身個麵包增添唔同味道~::: Cheese Bread :::呢個芝士包味道比洋蔥包濃, 亦都比較鹹, 所以就咁食唔駛加咩調味都好足夠! 不過, 當然加少少蕃茄醬味道又唔錯~
::: Onion Bread :::
呀菲話佢地嘅麵包係自家製, 所以我地都諗住叫d嚟試~ 個menu都有幾多款架喎, 咁多個之中我地叫咗2個, 其中一個係洋蔥包.
個麵包都幾大個, 大過平時麵包舖買嗰d~ 洋蔥包味道香甜, 有淡淡嘅洋蔥味, 咬落個包好鬆軟, 你話佢係即叫即做都唔算誇張, 當然唔係啦, 不過個新鮮感唔會喺其他廳餐食嘅麵包感受到~
除咗麵包本身有味, 隨麵包碟仲附上4種調味, 包括黑醋、橄欖油、蕃茄醬同原個蒜頭~ 除咗普通嘅黑醋橄欖油, 蕃茄醬都幾好味, 蕃茄味唔係好酸, 但係都好清新~ 另外都要一提個蒜頭, 好淋又好夠香, 蒜味豐富, 令本身個麵包增添唔同味道~
::: Cheese Bread :::
呢個芝士包味道比洋蔥包濃, 亦都比較鹹, 所以就咁食唔駛加咩調味都好足夠! 不過, 當然加少少蕃茄醬味道又唔錯~ 整體2個麵包都好有水準, 估唔到喺一間餐廳食到咁鬆軟新鮮嘅麵包~
::: Insalata di Burrata, Meloni e Prosciutto – Burrata, Melon & Prosciutto ::: $169
前菜小食嘅選擇都唔少, 因為大多都好有特式我地都要揀好耐先決定到~ 而小食又可以用60%嘅價錢叫一個份量少d嘅, 好似一個tasting menu咁, 即可以平d, 又可以試多幾樣~
先叫咗一個火腿~ 一人有一件, 看似份量唔多, 但係味道豐富, 火腿比較薄身, 味就唔係好鹹~ 火腿包住嘅仲有無花果、芝士同蜜瓜~ 火腿配上個同樣唔係好濃味嘅芝士食都幾夾個味, 無花果實實地好感覺好得意, 味道都幾鮮甜, 另外再加埋個好juicy嘅哈蜜瓜, 非常清甜好開胃~
::: Pacchetto Funghi e Tartufo – A “Parcel” of Black Truffle & Wild Mushrooms ::: $169
第二個小食我地見佢個名咁得意就叫咗~ 個名意思係一個黑松露野菌包裹~ 原來係一個黑松露野菌嘅酥皮批, 外面再加添個野菌醬汁, 未食聞一下已經好香,個汁望落都好吸引~ 一口咬落十分熱辣辣嘅酥皮口感鬆脆, 有啱啱焗起嗰隻燶味, 而野菌醬汁就係成個dish嘅靈魂, 好creamy好重菌味, d菇都好彈牙爽口, 十分唔錯~ 只不過黑松露可能份量唔多, 味就唔夠濃, 俾個野菌味比下去… 因為個醬汁夠多, 就算酥皮批裏面嘅野菌唔多, 都可以點周邊嗰d, 每一啖批都有豐富嘅味道, 好食!
::: Porchetta – Roasted Rolled up Boneless Suckling Pig with Chestnuts & Borlotti ::: $359
乳豬平時喺歐洲菜都會食到, 意大利式就真係第一次食~ 今次呢個乳豬肉仲配上栗子同意大利紅豆, 好期待~ 上枱喇, 原來$3XX嘅乳豬換來3件嘅份量, 再喺邊邊放上栗子製嘅醬汁… 原本心想有乜咁矜貴呢, 食咗就知物有所值~ 外脆內軟嘅乳豬肉好有層次感, 層皮燒得十分香脆惹味, 而肉又好嫩滑, 完全見唔到皮同肉之間有肥膏, 但係肉又唔會好乾, 有少少油咁, 但係帶少少油咁樣先至食到乳豬香~ 再點一下個栗子汁, 甜味十足, 栗子都好好味, 質地軟腍夠汁又帶甜, 除咗個野菌包裹呢個都好好味!
::: Risotto all'Aragosta – Lobster Risotto ::: $289
個龍蝦意大利飯就有少少失色, 可能我地都已經食過一次非常好味嘅龍蝦飯, 所以再食其他嘅就會有要求. 龍蝦只有半邊, 肉嘅份量都唔算多, 好在肉地都仲叫鮮, 彈牙感唔豐富, 喺呢d地方食只可以算合格… 個飯呢比較濕, 汁就多, 但係龍蝦味真係一d都唔濃烈, 如果用半邊龍蝦汁本身應該卓卓有餘, 飯嘅份量又唔多,但係好似個汁係用水開出嚟咁, 麻麻…
::: Tiramisu ::: $78
生日唔少得要叫個birthday cake~ 就叫咗呀菲最鐘意嘅tiramisu! Tiramisu唔算好大件, 但係mascarpone cheese質地夠軟滑, 食落有陣清香芝士味~ 不過佢就唔係用lady fingers, 反而係一隻類似lady fingers質地嘅蛋糕, 咖啡酒味濃而不嗆, 同芝士忌廉味道互相配合~ 好好味呀!
呢度嘅意大利菜式都叫特別, 好似好地道, 意大利家庭feel十足, 整體成間餐廳都幾浪漫, 暗暗嘅燈光好好情調~ 只係畢竟呢間商廈個間隔有d怪, 搞到個餐廳環境好窄, 有d俾人壓迫嘅感覺… 價錢係中上價, 同呢個地方好似唔太配合, 但係個食物質素確實有水準, 周不時食下都幾好嘅.
Post
