南亞餐廳1964 (Closed)

南亞餐廳已經歷了兩次結業，今次第三次重開，背負著歷史包袱開店從來都不是易事，甚至比開全新店更加困難，既不想有負上一代的名聲，又要想出新橋子吸客。除了泰菜外，東南亞食品亦對口胃，貪其簡便快捷，一個海南雞飯或一個喇沙就可攪掂一餐。夜晚喺亞士厘道想簡簡單單食完飯就返屋企，見到南亞餐廳，入去每人食碟飯就攪掂。南亞餐廳以海南雞飯馳名，就叫海南雞飯轉雞脾，雞肉嫩滑有雞味，有酸青瓜片墊底奉客。油飯淡黃濕潤而不爛，飯粒有光澤，做得不錯。摩囉雞飯有兩大件炸雞，我食果舊近翼位，熱辣嫩滑，另有辣醬配番茄青瓜、半隻蛋、炸花生小魚，食材豐富。再叫多一個小食藍青口配多士伴喇沙汁，配搭創新，藍青口嫩滑無渣，不過青口本身掛汁能力不高，如果唔連汁飲，食唔到喇沙汁味。多士冇再焗熱同落牛油，既不熱又不脆，點汁食有點韌，再焗熱會好食好多。