越北牛肉粉

Open Now

Now Closed

今日朋友約我陪佢帶個仔去冒險樂園玩。玩完對面正正就有呢間越北餐廳，小朋友又餓，價錢又唔貴就決定喺度食。夜晚佢哋有套餐,可以揀小食，主菜同飲品。我地就要咗個生牛肉湯粉配越式烤豬頸肉同埋薄荷青檸梳打。另外就再叫咗個路邊烤雞肉串撈檬同越北招牌牛肉丸湯。烤豬頸肉，份量都幾多，外側烤得夠香口，用上炸蒜同香蔥去烤，食落多左一重香氣，豬頸肉唔會鞋口，好味！生牛肉最緊要湯底夠熱，呢度個湯底就做到！而且湯底味道清香，濃郁，生牛肉份量十足，輕輕浸喺湯底就食得，牛肉非常嫩滑！湯底配埋河粉同其他配料（青檸，辣椒等）一齊食更有風味，飲埋湯底都唔會口渴，食得好滋味。雞肉串一客3串，上面同樣撒滿炸蒜香蔥，雞串夠嫩滑惹味，撈檬嘅靈魂醬汁味道岩岩好，淡淡酸酸辣辣，撈檬彈牙嘅口感，食落特別開胃。牛肉丸湯又係另一推介，一客有8粒，牛肉味濃，仲有d脂肪係入面，咬落非常爽口彈牙，口感十足， 白蘿蔔吸收晒湯汁，甜甜又無渣，好食！飲埋青檸梳打，清新醒神，涼透心，大滿足！