Felice Cafe & Pasta (Closed)

Lunch hour嚟到銅鑼灣希雲街周圍都好熱鬧，今次就揀咗Felice Cafe試試😋午餐送迷你沙律，以黑醋同橄欖油調味夠健康～蒜香雜菌意粉貌似簡單但食落出奇地美味－意粉軟硬度適中，每啖都充滿住好香嘅蒜味，唔會因為冇醬汁而變得單調，加上炒香咗嘅雜菌，香味十足。燒汁豚肉意粉就有日式西餐炒意粉嘅味道，意粉一樣沾滿燒汁，薄片豚肉入味唔老，仲有三色椒同洋蔥增添口感，帶啲油份唔會乾爭爭。午餐本身跟奶茶檸茶，但嚟到cafe都想試下啲特飲－牛油果同乳酸對腸道健康亦都好有益，打成沙冰清新易入口；菊花蜜滋潤養生，啱晒長期對住電話電腦嘅上班族。