七月餐室 (Closed)

九龍灣工商區呢邊其實幾多茶餐廳，但好多都係工廈入面感覺幾頹…近日發現開左間新野叫七月，門口企理入面光猛，感覺唔錯喎。價位同附近餐廳差唔多，午餐選擇都幾多，炒粉麵飯、港式、中式、西式、台式、日式等大包圍，總有一款啱口味，哈哈。叫左個揚州炒飯，大碟又足料，金黃色好吸引，炒到啲飯粒粒分明，仲唔油膩添，好香好好食！另外仲叫左個漏奶華，個名好搞笑，哈哈，見隔離枱食好正咁，即叫唔使諗。以為係西多士加阿華田粉？無咁簡單呀，一切開啲奶就湧出嚟，真係漏奶啦～多士軟綿外層炸得香脆，灑上大量阿華田粉，塊多士仲夾咗牛油同埋花生醬，撈埋啲奶一齊食真係又香又甜，邪惡到爆分。餐飲要咗杯凍檸茶走甜，茶底幾香檸檬冇苦，合格啦。個西多製作需時，碟飯食到一半個西多就嚟咗喇，見佢熱辣辣唔好嘥，梗係食咗個西多先啦，食完都飽咗，碟飯食唔曬唯有打包啦～滿足滿足！