麻辣風雲 (Renamed) View

負分，極度建議麻辣風雲改名做餐飲業之恥，啲嘢食直頭可以用豬餿嚟形容。叫咗一碟瑤柱蛋白菜粒炒飯，蔥爆羊肉同埋杯唔記得咩水蜜桃雜果茶。簡單啲講杯嘢飲先，個味同你喺7仔買支裝嗰啲水蜜桃茶一樣味，嚴重懷疑係同一支嘢倒落去，仲要買$38。碟炒飯同埋炒羊肉都係上枱完全聞唔到有香味，就算你飯煲煲飯都會有飯香味吖，佢係乜都冇，炒飯食落去完全冇味不特止，啲飯仲要係未炒透，啲飯一嚿嚿，有啲個心仲係凍嘅成碟嘢，口感30度左右完全唔夠熱，碟嘢叫瑤柱蛋白菜粒炒飯，雖然瑤柱同蛋白都係有但係完全食唔到有味囉。碟蔥爆羊肉仲過分，羊肉有冇臊味都好取決於隻羊食咩，但至少你蔥爆都會有陣蔥味卦，sorry並沒有，啲羊肉係過火度硬到一個點，咬落去唔係嚡咁簡單係你羊肉片煮到燶晒嗰隻硬，預期話蔥爆羊肉不如改名做炒羊肉乾仲貼切。成餐飯一個炒飯一碟羊肉乾一杯嘢飲，梗係買+1 235埋單，係我食過最貴嘅豬餿。真心完全唔建議去食，就算有人請都唔會再去，完。