蘭度小籠包 (Closed)

朋友想食上海菜，但得兩個人點唔到幾多款，所以打消左去老派上海菜館嘅念頭，咁岩蘭杜街有間蘭度小籠包新開冇冇耐，餐牌簡而精，常見上海菜式都有，價錢亦都合理，就食佢啦。🍴小籠包（4隻） HK$45小龍包外皮皺褶尚算工整，厚薄適中，晶瑩剔透，夾起尖端唔易穿，肉餡鮮甜但偏細，湯汁夠熱唔油膩，加少少醋同薑絲可以提鮮。🍴紅燒獅子頭 HK$88細個第一次食獅子頭，以為真係獅子肉，原來係豬肉。獅子頭咬落雖然未到入口即化嘅境界，但尚算軟綿，肥瘦比例適中，肥而不膩，冇豬臊味，紅燒汁迎合香港人口味，唔會過鹹。🍴牛肉絲雙麵黃 HK$62正宗兩面黃應該外脆內軟，而呢碟睇落同茶記牛柳絲炒麵好似，做法亦都算港式，整個麵餅炸脆。雖然唔正宗，但夠脆口乾身，芡汁唔會太鹹同油膩，牛肉份量多過麵，不過醃得腍左啲，如果可以，我寧願麵多過牛肉，麵先係主角。🍴豆漿 HK$10豆味不錯，唔會太稀同太甜。📍蘭度小籠包灣仔蘭杜街2號麗都大廈地下3號舖