五要素食堂 (Closed)

The ONE最近開咗一間日式西餐，門面簡約得嚟都幾靚，取名第五元素。食物選擇都相當多，仲有好多唔同種類嘅小食可供選擇。如果外賣就更加優惠，不過一場嚟到，都係決定坐低堂食慢慢嘆。出嚟食午飯，最怕等得耐搞到遲到返Office，而呢度上菜速度好快，所以我仲趕得切影返張大合照。黑毛和牛沙律係薄切牛肉，牛肉非常林身同嫩滑，沙律菜用咗火箭菜，再配上和風味沙律醬汁，食落醒神開胃，我就最鍾意有超多菜，感覺既健康又清新！呢度嘅意粉係手工意粉，所以特別煙韌彈牙，原來呢個意粉上面同樣地加咗火箭菜，再有菇片同紅椒絲，雖然係素食，但絕對唔覺得孤寡。和風煙肉薄餅上面有煙肉、蘑菇、芝士同埋一啲紫菜絲，我最鍾意佢嘅手工薄餅底，批邊飽滿而且好似新鮮出爐嘅麵包咁，好有口感，呢個9” size，兩個人食就剛剛好。今日難得約到呢個好耐冇見嘅舊同事，又發掘到一間值得一試嘅新餐廳，真係值得感恩嘅一天！