Brass Spoon (匯豪峰) (Closed)

越南牛肉粉專門店有好多選擇，聽講Brass spoon好多人都讚好，而且係米芝蓮推介，所以即管嚟試下係咪咁好味。餐廳格局好有日本拉麵店feel，大部份係bar枱位置。就連點餐方法都好似食拉麵，每碗寫一張點餐紙。配料例如洋蔥、蔥、芫茜同牛湯油都可以根據自己口味選擇份量或者走。除咗牛肉粉，仲有幾款撈檬粉同小食選擇。鍾意食芫茜嘅我哋都點咗多芫茜，一上枱見到成碗都鋪滿晒芫茜已經覺得正芽菜同香草係用小碗另上，香草有九層塔、薄荷同鵝芥。生牛肉浸喺滾湯入面，變成半熟嘅粉紅色，賣相好靚。未落香草之前飲一啖湯試真啲味道，牛骨湯底清澈呈茶色，一啲都唔油膩，牛骨味濃郁但唔會過鹹。之後就將香草加入湯底，擠少少青檸汁。加埋香草嘅香味同青檸嘅清新，令湯底味道更豐富河粉非常滑溜，滑到用筷子夾起時會唔小心滑走😂我牛肉都幾大片唔會碎濕濕，肉質嫩滑而且牛肉味濃整體嚟講牛肉粉的確高質，湯底同牛肉都好味。只係河粉份量比較少，同埋定價比較進取。下次會再嚟試下特級生牛肉粉。