莆田 (形點 I)

Open Now

Now Closed

原本星期日約左朋友去三聖村食海鮮，點知中午12點去到，成條街triple parking，酒樓入面更係people mountain people sea,免得又有群組，轉軚去元朗區，一樣車水馬龍，慨嘆搵個清靜地方都難。泊車入形點，諗住食肆多啲，分散人流，但多數都排隊，瞥眼見到呢間莆田，乾淨企理有特色，仲話米芝連星級，決定坐低慢慢食。點左酥炸黃花、鐵板豆腐、黃金海蠣餅、冰心榴蓮，結果除左個冰心榴蓮，其他連相都唔影，有啲失望。首先酥炸黃花，外皮唔夠酥脆，差少少；再嚟鐵板豆腐，唔夠啫啫聲，冇聲氣，普通排檔更勝一籌。最期待黃金海蠣酥餅，海蠣算新鮮，但係酥餅皮唔夠酥脆，炸得亦唔好，上枱餅底聚左一層油😟，最後係冰心榴連，用酥皮包住榴連蓉，外皮一樣唔脆，底下有啲汁，食唔出咩材料，不甜不滑，可有可無，唯獨是個榴蓮蓉還可以。整體而言，個米芝連招牌有啲名過其實，雖然價錢唔算好貴，菜式算有特色，但廚功鑊氣差左啲，失色不少，希望食店攞左米芝連星，要保住嗰招牌，對廚房嘅要求一定要維持，否則最後都係會俾人踢走。