Good Times Restaurant And Bar (Closed)

聽朋友講和墟開左間裝修幾靚同好味既西餐廳，今日就同左成家人去食👨‍👩‍👧‍👧估唔到一試真係唔錯。住左咁多年粉嶺，終於有間西餐廳係值得讚賞，性價比非常高。而且地方寬大，岩曬同朋友係到飲酒吹水。前菜叫左蕃茄水牛芝士薄餅，新鮮出爐熱拿拿，個底係薄身，芝士分量適中，連平時唔鐘意食蕃茄既我都覺得好味。呢個小食拼盤個人覺得比較普通，分量較少岩2-3人食，雞翼炸到好似M記脆香雞翼，岩曬我口味，全部都炸到脆卜卜。黎到主菜我地叫左脆皮德國咸豬肘配酸椰菜，賣相好靚，而且佢係好貼心切埋比你。呢個一定係必點，外脆內軟，d肉唔會太硬。其實呢個可以係套餐連兩杯啤酒（$298)，岩曬夜晚過黎食宵夜睇波，因為呢到都開到好夜先收舖。雖然呢到都出名食牛扒，但我地成家都鐘意食羊多d，所以叫左板燒澳洲頂級羊髀扒，唔會太膻而且肉質好林，旁邊仲配左d南瓜蓉，甜甜地幾好食。呢個係額外加既烤焗香草椰菜花蓉（ ＋$25)，見個名幾得意又未試過就叫左，有d口感好過食薯蓉。最後係餐牌上見到呢個黑松露牛肝菌意大利飯配海鱸魚係推介菜，但當日冇曬鱸魚用左石班代替，條魚好滑，最更要就係意大利飯既軟硬程度拿捏得好好，我比5星⭐️⭐️⭐️⭐️⭐️