茶煲

Open Now

Now Closed

聽朋友講呢個屋邨商場新開咗一間裝修優雅嘅酒樓，價錢唔貴，而且都幾好味。我哋大概兩點到，可能新開無咩人知亦無咩宣傳，客人並唔多。酒樓牆身，天花，櫈都用粉色，感覺清新別緻，食物方面的確唔錯，職員亦有禮，特別係收銀小姐，有禮亦有笑容，價錢唔貴，兩個人叫咗五個點心一個炒河，埋單$160有找。新鮮炸好嘅安蝦鹹水角外面脆裏面煙韌。流沙奶皇包，熱辣辣有流沙㗎，如果有埋鹹蛋黃就更好味喇。鮮竹牛肉球感覺無咁某啲酒樓重鹼水味，有多少少牛肉質感。金剛米網腸，裏面脆卜卜，腸粉皮夠滑，好味。呢款泰式炒河味道可以，但真係太多油喇，我食完碗剩好多油喺底。香脆蛋散，我好鐘意呢款甜品，呢間係我食過第二間有呢款甜品嘅酒樓，做得唔錯，全件都鬆化，唔會某啲厚嘅地方食落口係特別硬。