心滿意粥

Open Now

Now Closed

嚟西環做嘢，見天氣凍冰冰，晏晝想食碗熱粥暖下胃。記得早幾日路過卑路乍街，見到有間新開粥店，一於試下。店舖主打傳統粥品，單係生滾粥就已經有成十幾款，另外仲有腸粉、油器、炒麵和鹹肉粽等供應。點咗炸兩、腸粉、兩碗粥同一隻粽，回味炸兩做得唔錯，腸粉皮厚薄適中，油炸鬼脆卜卜，點埋甜醬同麻醬食，真心好味。碟叉燒腸亦頗有水準，腸粉皮拉得好滑，叉燒有調味過先捲，做得好有心機，食到叉燒香味！狀元及第粥材料好豐富，有豬腰、豬潤、粉腸、豬肚同肉丸等，另外仲加咗皮蛋。粥底綿密細滑，濃稠度啱啱好，豬潤粉嫩爽滑、大件又厚身；肉丸自家製，富豬肉鮮味。至於呢碗生滾魚腩粥亦很有驚喜，魚腩有好多件，新鮮肥美，肉厚又無泥味，加咗鮮牛肉，牛肉鮮香嫩滑，粥底綿甜富米香，食完大滿足。蛋黃鹹肉粽大大隻，鹹蛋黃靚，肥肉入口即化，用嚟送粥一流！ 見鄰桌點了黃糖糕同白糖糕又跟風試下，兩款都好好味，糕身鬆軟，甜度適中，絕對值得一吃。