發哥粥底海鮮火鍋 (Closed)

難得中秋節有得早收工，約咗屋企人一齊出街食做節。呢間餐廳日頭係360冰室，夜晚就轉做主打海鮮粥底火鍋。今次我哋就揀咗龍蝦豪華海鮮套餐。涼菜分別係南乳花生同涼拌青瓜，花生煮得好入味，青瓜酸中帶辣幾開胃。跟餐每位有2隻蒜蓉泰醬焗青口，焗得唔會太乾身香口好味。燉湯一飲就知係自家製好足料，味道清甜無味精超好飲。冰填鮑魚口感清爽鮮甜。主角海鮮拼盤按人頭份量計，每一款都好新鮮。龍蝦每位半隻，有成隻手掌咁大，蝦肉好爽口彈牙。聖子皇肥美入口唔韌有嚼勁。貴妃蚌肉厚好鮮美。海蝦鮮甜無腥味。多寶魚口感軟滑。蜆有幾款，味道鮮甜口感嫩滑，但有一兩粒入面有少少沙。火鍋配料跟餐除咗有一碟安格斯牛肩肉外，仲可以每檯自選8款火鍋配料，常見嘅種類都有揀。除咗汽水外仲有竹蔗水無限任拎。最後試埋個粥底，吸收曬海鮮嘅精華，味道好鮮甜。