靠得住粥麵小館 (Closed)

今日午餐食清淡啲， 去咗間粥店。 呢間連鎖式經營嘅粥店係米芝蓮之選， 質素自然有保證。舖頭人流都算多， 車輪轉咁， 大約等咗十分鐘先至有位。 鋪頭都算乾淨， 枱櫈同餐具等都算企理。今次就嗌咗碗蠔仔粥搭配舖頭自家製嘅招牌鹹肉粽， 另外就嗌咗客獅子頭菜飯。講咗碗粥先， 呢度嘅粥底標榜無味精， 但出奇地粥非常鮮味， 因為舖頭粥底係由鮮雞淆製而成， 所以齋食粥已經非常惹味， 搭配蠔仔嘅鮮味， 可以話係畫龍點睛。 呢度嘅粥 ，真係仲好味過出面啲味精粥， 超級終極強烈推介。獅子頭菜飯係上海菜， 食得出落咗花雕酒， 令到獅子頭唔單止好味，仲非常之香。 豬肉碎搭配豆腐同蛋嗰種口感， 真係吸引人一啖錫一啖，食到唔識停。呢兩味餸價值都係80蚊左右， 味道咁好而言， 超抵食。