真鮨 (Closed)

食得多尖咀連鎖餐廳有d厭，於是呢日跟同事去左呢間近美麗華既日本餐廳食午飯。入到黎見到底層有個榻榻米，好有日本風感覺喎。我地叫左個兩個餐: 壽司同鰻魚蛋包飯。隻碟幾靚，吾知係邊買。味付螺肉9秒9就到。螺肉有咬口，吾un，自認細食既同事都話食完胃口大增喎。蒸蛋有鳴門卷、香菇同魚籽做配料。蛋好滑，有陣陣蛋香，配料特別係魚籽提升左口感。麵豉湯咸度剛好，仲有吾少豆腐同海帶，一d都吾寡。話咁快鰻魚蛋包飯黎度。大過塊面既鰻魚原條咁放係蛋包飯上面，賣相精緻。蛋汁同咖哩好夾，味道平衡吾錯。雖然咖哩汁份量多，但都無沉淋d飯，因為d蛋夠濃密，隔住d咖哩汁。鰻魚表面有焦香，嫩滑厚肉，兩人分享好滿足。過一陣，壽司都黎埋，有8大舊:三文魚、八爪魚、墨魚、甜蝦、北寄貝、海膽、玉子和三文魚籽。三文魚肥美，仲有幾粒魚籽係上面。甜蝦好大隻，而且鮮甜度十足。魚生大大塊咁餔上飯度。海膽係份量吾吝嗇，一d腥味都無，味道甘甜，質感細膩，入口即溶，正。埋單每人一百蚊多d，以尖咀地段同食物質素來說，性比價頗高，值得一試。