水木日本料理 (Moved) New Location

有日想食d好食既日本菜，就上網搵左呢間評價唔錯既水木日本料理，佢既地點都幾方便，地鐵站出黎行五分鐘就到。餐廳既裝潢都幾高級，有d吧枱可以比你睇住司傅整壽司。食日本菜通常都會飲酒，老闆推薦我地試下支日本sparkling清酒，以清酒黎講算係低濃度，大約12%，飲落去非常清新，米酒味都幾濃。前菜已經非常有睇頭，五樣前菜放晒係一個橫碟到上菜，左起係汁煮東風螺，螺肉非常軟，煮到入晒味，甜味十足。隔離係甘露黑豆，黑豆煮完再雪凍，好甜。之後係黑松露豆腐，一啖將蝦，黑松露，青瓜同豆腐擺落口，混合埋味道好夾而係好清新開胃。跟住係枝豆，再落係鮟鱇魚肝，聽就聽得多，都係第一次食，魚味濃郁。冰菜沙律，係香港好似越來越多人食冰菜，佢爽脆既口感非常適合做成沙律。加州卷就平時食到既差唔多，不過感覺比較新鮮。之後我地叫左燒虎蝦同羊架。虎蝦好大隻，燒到好惹味，啖啖肉，仲有好多膏。羊架一d都唔酥，肉非常腍，唔需要用力已經可以咬開，配埋個mustard醬好夾。最後叫埋壽司盛合填飽個肚，當中個吞拿魚壽司最出色，吞拿魚魚肉好似和牛既顔色，咬落去成口都係油，非常濃郁同肥美。