升哥點心 (Closed)

朋友住喺元朗幾十年， 最近話試過有間新開嘅點心店唔錯， 於是呢日就約咗我去一齊食點心。西洋菜南北杏燉豬肺呢款湯水好清潤， 豬肺洗得好乾淨， 加埋西洋菜， 成個湯都好甜。籠仔鹹魚肉餅飯鹹魚用咗梅香鹹魚， 肉餅結實得來有咬口，唔會係死實實咁， 鹹魚夾埋肉餅一齊食， 兩者鮮味更為突出， 由於米飯係用蒸籠蒸出來嘅緣故， 食落比較有口感。升哥蝦餃皇蝦餃嘅外皮晶瑩煙韌， 蝦肉彈牙大粒， 加上少少筍絲同肥肉粒， 食落更加香口，好正! 原隻蝦燒賣燒賣嘅豬肉應該係手切嘅新鮮豬肉， 咬落比較有口感， 加上冬菇粒爽口，香味濃郁，面頭舖有一層彈口嘅蝦膠，大愛! XO醬菜苗餃菜苗餃用嘅菜苗新鮮爽脆，加埋少少蝦肉，用蒜蓉炒過，已經好好味，再加上香辣嘅XO醬，就更惹味。潮州蒸粉果粉果外皮煙韌， 餡料清新爽口， 配上辣椒油同吃，味道更突出。招牌流沙包流沙包麵有不同表情圖案，增添一分趣味， 流沙包一咬落去有驚喜，裡面嘅餡料係流動嘅，食到啖啖鹹蛋黃香味，但整體唔會過甜。雖然餐廳係小店，但製作用心，點心水準好高，下次會再約朋友過去幫襯。